(AILEU) Lian Karau Dikur-Presidente Autoridade Munisipiu Aileu (PAM), optimista munisipiu Aileu tama faze dahuluk ba desentralizasaun administrativa no poder lokál, ne’ebé sei akontese iha tinan 2027
Presidente Autoridade Munisipiu Aileu (PAM) João Bosco dos Santos, dehan Aileu optimista hakarak tama faze dahuluk ba kamara munisipal, tanba saida mak Aileu tama faze dahuluk, ita haree ba istória sira ba kotuk ukun-an ne’e inisia husi Aileu, tanba buat hotu ne’ebé ema temi iha fatin-fatin, sempre temi Aileu nia naran, tanba ita haree fatin ida ne’e istória boot ida ne’ebé akontese golpe hodi ema hotu mai sulan iha ne’e, husi istória sira ne’e ohin loron ema hotu bele ko’alia.
“Husi istória pasadu sira ne’e lori ita ba haree progresu no desenvolvimentu barak mak halo ona iha Aileu, tanba ne’e mak ami preparadu ho kondisaun ne’ebé ami iha, ho nune’e ami prontu tama faze dahuluk ba poder lokál iha tinan 2027, maibé dezisaun tomak ita hein konsellu ministru mak sei deside iha fulan Maio nia laran no resultadu sei fó sai iha 20 de Maio 2026”, Dehan Presidente Autoridade Munisipiu Aileu (PAM), João Bosco ba iha salaun Timor-Klaran Aileu, Kinta (26/02/26)
Nia dehan, maske antes ne’e Ministeriu Administrasaun Estatal (MAE) halo ona avaliasaun ba faze dahuluk, iha Aileu hetan kategoria “BOM”, maske iha buat balun ita hetan kategoria “MUITU-BOM”, husi ne’e nota katak iha buat balu mak presiza atu hadia.
“Bainhira ita apresenta relatoriu iha fulan rua liu ba hamutuk ho Primeiru Ministru no PAM, sanulu resin tolu iha INAP, tanba ne’e mak ohin vizita Primeiru ministru mai munisipiu Aileu, atu haree direta progresu desenvolvimentu sira ne’ebé mak durante ne’e ita halo, maske relatoriu sira iha ona Estatal, maibé Xanana Gusmão hakarak tun direita hodi haree kondisaun sira iha munisipiu Aileu loos duni ka lae, ho ida ne’e ohin ita apresenta susesu sira durante tinan rua ita halo, tanba ezekusaun orsamentu husi tinan 2023 to’o 2027, ita apresenta kona-ba prosesu ezekunsaun durante ne’e ita halo saida, liu-liu liga ba programa PNDS no Merenda-eskolar”, PAM, relata
Nia hatutan, husi resultadu ne’ebé ita apresenta sei lori ba Konsellu Ministru (KM) hodi deside, atu simu poder lokál iha tinan 2027, maske munisipiu hotu bele ba, maibé hein dezisaun husi leten, ne’ebé realidade ita apresenta kona-ba kondisaun real munisipiu Aileu nian relasiona ho orsamentu ne’ebé aprova hahú iha 2023 to’o 2026 ne’ebé ohin ita apresenta.
“PAM, dehan durante ne’e ami identifika hela buat balu, maibé buat sira ne’e hanesan parte ida atu haforsa liu tan ami iha prosesu ida ne’e, tanba desentralizasaun administrative no poder lokál ne’e la’os presidente autoridade mesak deit, maibé presiza ema Aileu tomak nia koperasaun no kordenasaun hodi ita haree hamutuk ita nia susesu ne’e iha ne’ebé no ita nia fallansu sira ne’e iha ne’ebé, hodi tur hamutuk buka dalan oinsá atu hadia, atu nune’e ita bele hakat liu bareira ne’ebé sei mai iha tinan 2027, tanba desentralizasaun mai Aileu la’os autoridade servisu munisipais sanulu resin sia deit lae, maibé partisipasaun ema Aileu hotu nian liu-liu intelektual no joventude”
Maske avaliasaun resultadu faze dahuluk nian iha buat balu kategoria “muitu bom”, alende buat balu “bom” husi ida ne’e komisaun rasik rekomenda mai ita atu hadia, tanba ne’e hahú ohin ba oin ita tenta atu identifika no tur hamutuk hanesan Aileu-oan hodi haree ba fallansu sira ne’ebé mak ita atu hadia, atu nune’e ekipa avaliasaun sira tun mai haree fila fali Aileu bele tama ka lae.
“Ita rekoñese katak hanesan autoridade munisipiu Aileu, la ukun partidu, maibé ukun povu, karik buat ruma la diak, autoridade nia odamatan nakloke ba sé deit mak atu mai, atu nune’e ita tur hamutuk hodi ko’alia, labele kahur sasan tun sae, mai ita hamutuk hodi haree ba desenvolvimentu Aileu nian to’o ona iha ne’ebé”. PAM Aileu, hakotu.
Ekipa Kobertura : Lian Karau Dikur
