Lian Karau Dikur (Dili) – Kompañia Besi Tua Unipessoal Lda. manifesta prontidaun atu koopera ho Governu Timor-Leste ba prosesu dezenvolvimentu nasional, maibé husu atu Governu konsidera mós situasaun traballadór na’in 80 ne’ebé bele lakon sira-nia servisu, se kompañia ne’e tenke sai husi fatin ne’ebé lokaliza iha área Tasi Tolu, Dili.
Na’in ba Kompañia Besi Tua Unipessoal Lda., Agostino da Costa Malibere, hatete katak nia kompañia prontu atu koopera ho Estadu ba dezenvolvimentu nasional. Maski nune’e, nia husu atu Governu haree mós ba interese kompañia no traballadór Timor-oan sira ne’ebé depende ba servisu iha kompañia ne’e.
“Ami prontu kopera Ho governu atu halo Dezenvolvimentu kompaña Besitua Unipesoal LDA fó servisu ba trablhador hamutuk ema na’in 80 karik estadu hasai ami husi fatin ne’e ema hira ne sei lakon sira nia servisu” dehan nain ba Kompaña Besi Tua Unipesoal LDA, Agostino da Costa Malibere iha nia Tasi Tolu Dili
Nia hatete katak, atu hala’o dezenvolvimentu, Governu tenke halo desizaun ho kuidadu no konsidera impaktu ba komunidade, liuliu ba povu vulnerável ne’ebé depende ba atividade ekonomia atu sustenta sira-nia moris.
“Governu atu halo dezenvolvimentu maibé tenki tetu didiak tanba povu mak sei sai terus ami hakarak dezenvolvimentu maibé tenki halo ho Justu atu labele haterus ami povu kbiit laek ami husu atu sukat didiak ami nia hela fatin ami rekoñese rai ne’e estadu nian, maibe uma ne’e ami hari sakrifika ami nian durante tinan barak nia laran” nia hatete
Iha parte seluk, xefe traballadór, Eduardo Belo dos Santos, argumenta katak Governu Timor-Leste tenke konsidera mós kontribuisaun kompañia besi tua nian ba dezenvolvimentu nasional, no la fó atensaun de’it ba kompañia estranjeira.
Nia esplika katak besi tua ne’ebé ema konsidera hanesan lixu bele sai rekursu ekonomia ne’ebé iha valor, tanba bele rekolle no prosesu fali atu uza ba atividade ekonomia seluk.
“Lixu ema hateke katak lixu ne’e foer maibé lixu ne rekursu ida ne’ebé la maran ita koalia mina rai iha tempu ida sei maran mais ita koalia konaba besi Tua nia sei la maran bainhira ema sei moris, tanba ne’e fatin imi bele Gusur maibé estadu tenki tau fatin ida ba Besitua la’ós suporta de’it China” dehan Eduardo Belo dos Santos.
Kompañia Besi Tua Unipessoal Lda. ne’ebé lokaliza iha área Tasi Tolu, Dili, emprega traballadór Timor-oan hamutuk na’in 80. Kompañia ne’e husu ba Governu atu buka solusaun ne’ebé bele permite dezenvolvimentu nasional kontinua, no iha tempu hanesan proteje empregu no fonte rendimentu traballadór sira-nian.
Ekipa Kobertura: Lian Karau Dikur
