Lian Karau Dikur (Covalima), 09 Setembru 2026–Polísia Nasionál Timor-Leste (PNTL), Munisípiu Covalima, deporta sidadaun Indonézia na’in-12 ba nia sidadaun orijen, tanba uza pasaporte foto kópia hodi halo atividade negósiu iha Munisípiu Covalima.
Sidadaun Indonézia na’in-12 ne’e tama mai Timor-Leste liuhusi fronteira Mota Masin ho viza turista. Maibé, PNTL detekta katak sira hala’o atividade negósiu ne’ebé la tuir objetivu no kondisaun husi viza turista.
Segundu Komandante PNTL Munisípiu Covalima, Superintendente Asistente, Patrício de Jesus, PNTL detekta no kaptura sidadaun Indonézia ne’e iha loron 4 Agostu 2026, hodi halo prosesu identifikasaun no investigasaun tuir prosedimentu legal.
“Sidadaun ne’ebé mak deporta fila maioria mai husi Indonézia, tanba sira tama ho viza turista. Maibé, bainhira servisu intelijénsia detekta katak sira hala’o atividade negósiu, PNTL halo kaptura no lori sira ba Komandu atu hala’o prosesu tuir lei,” dehan Patrício de Jesus ba jornalista sira iha Komandu PNTL Covalima, Santa Rosa, ohin.
Bazeia ba rezultadu investigasaun, PNTL hetan katak sidadaun na’in-12 ne’e uza pasaporte foto kópia, la’ós pasaporte orijinál. Aleinde ne’e, dokumentu balu nia prazu validade mós remata ona.
“Bainhira sidadaun halo viajen, tenke uza pasaporte orijinál no válidu. La bele uza foto kópia pasaporte, liuliu dokumentu ne’ebé nia prazu validade remata ona,” nia hatete
Hare ba rezultadu husi prosesu identifikasaun no investigasaun, PNTL Covalima halo koordenasaun ho autoridade Imigrasaun atu asegura prosesu deportasaun ba sidadaun Indonézia na’in-12 ne’e fila ba sira-nia rai.
Patrício de Jesus mós hatete Polisia Nasional Timor-Leste (PNTL) detekta sidadaun sira ne’e iha fatin oioin iha territóriu Munisípiu Covalima, to’o iha nivel suku no aldeia.
Segundu Komandante PNTL Munisípiu Covalima, Superintendente Asistente Patrício de Jesus,apela ba sidadaun estranjeiru hotu atu respeita no kumpre regra no prosedimentu imigrasaun ne’ebé vigora iha Timor-Leste, inklui uza dokumentu viajen orijinál no válidu bainhira tama no hala’o atividade iha territóriu Timor-Leste.
Jornalista: Chung
