Lian Krau Dikur (Dili)-Ministru Obras Públikas (MOP), Samuel Marçal, hateten katak konstrusaun estrada iha Ermera sei iha hela prosesu nia laran, tanba ne’e husu ba populasaun atu nafatin kalma no hein ho pasénsia, tanba projetu ne’e envolve orsamentu boot no tenke tuir kriteriu rigorozu husi Banku Mundial.
“Osan ne’ebé uza ba projetu ne’e mak emprestimu, entaun tenke tuir regra no prosedimentu Banku Mundial nian. Kontratu sira lansa tiha ona, maibé presiza tempu atu liu husi prosesu legal sira inklui tribunal, no kompañia mos presiza tempu atu prepara mobilizasaun no ekipamentu,” dehan Samuel Marçal ba jornalista sira iha Palásiu Governu.
Nia subliña katak, konstrusaun estrada la bele halo lalais de’it hanesan prepara hahán instantánte hanesan POP Mie.
“Se ita halo lalais tebes hanesan fakar bee manas ba POP Mie no han kedas, rezultadu sei la di’ak no bele estraga osan barak. Ita presiza halo estrada ne’ebé di’ak no dura ba tempu naruk,” nia hateten.
Ministru afirma, projetu estrada Ermera sei lao tuir kalendáriu no prosedimentu ne’ebé iha.
“avançamos bem” hodi hatudu katak progresu projetu lao di’ak tuir planu, maski lori tempu”
Governante ne’e hatete nia sei kontinua halo nia servisu ho responsabilidade, la depende ba opiniaun ema seluk.
“Hau halo servisu tuir hau nia vizsaun ho pasénsia no kalma, atu garante kualidade. La’ós hakarak halo buat hotu ohin kedas, depois aban estraga hotu,” nia afirma.
Ministru husu ba komunidade atu komprende katak dezenvolvimentu infraestrutura presiza tempu, planeamentu no rigor, hodi asegura katak rezultadu final bele benefisia ba povu iha tempu naruk
Jornalista: Tachung
