Dili, 05 Outubru 2026 — Polísia Nasionál Timor-Leste (PNTL) sei halo operasaun no prega multa ba kareta baskolante sira ne’ebé tula rai-henek, krikin no materiál sira seluk, maibé la taka ho lona durante halo transporte iha estrada sira iha Dili.
Komandante Munisípiu Dili, Asistente Komisariu Polisia, Orlando Gomes afirma katak, PNTL sei halo enkontru no konferénsia imprensa hodi fó avizu ba públiku, antes ekipa polísia halo operasaun ba kareta sira ne’ebé tula materiál sem taka ho lona.
“Agora ita halo enkontru, depois ita halo konferénsia imprensa ida hodi avizu ba públiku. Depois ekipa ida-ne’e sei halo operasaun ba fatin sira ne’ebé ita nia transporte sira tula fatuk-kerikil no rai-henek. Hotu-hotu tenki uza terpal ka lona no taka metin atu nune’e labele namkari no hafo’er estrada,” dehan Komandante Munisípiu Dili, Asistente Komisariu Polisia, Orlando Gomes iha Komandu Munisípiu Dili
Nia hatutan katak, PNTL sei halo operasaun no husu ba motorista sira ne’ebé tula rai-henek, krikin no fo’er sira seluk atu kuidadu, asegura no taka metin sira nia karga.
“Ita sei halo operasaun ida atu husu ba motorista sira ne’ebé tula rai-henek, tula fatuk-kerikil ka tula kualkér fo’er ruma, tenki kuidadu, asegura no taka metin atu nune’e labele halo fo’er iha sidade Dili. Se la kumpri, ita sei prega multa no, se iha kazu krime, sei prosesu tuir lei. Se iha infrasaun ruma, ita sei prega multa ba sira, atu nune’e hotu-hotu iha responsabilidade atu kuidadu ita nia sidade Dili,” nia hakotu
Ekipa Kobertura: Lian Karau Dikur
