Lian Karau Dikur (Dili)-24/05/2026 Partidu Kmanek Haburas Unidade Nasional Timor Oan (KHUNTO) fo posse ba Estrutura foun hamutuk 720 iha suku madohi Postu administrativu Dom Aleixo Munisípiu Dili hodi garantia ba Eleisaun Prezidensiál no Parlamentár ne’ebé sei akontese iha tinan 2027-2028
Konsileiro Masimu Partidu Kmanek Haburas Unidade Nasional Timo Oan (KHUNTO), José do Santos “Naimori Bucar” hatete, liu husi Posse ne’e hodi hametin estrutura Suku Madohi nian nune’e hodi garantia ba Elisaun Prezidensiál no Eleisaun Parlamentár nian.
“Ohin tomada de posse ne’e suku madohi de’it ida ne’e sira nia forsa ida ne’ebé mak atu hametin sira nia estrutura para atu nune’e hodi hare ba Elisaun ne’ebé sei akontese iha tinan 2027 no 2028 nian” dehan Konsileiro Masimu Partidu KHUNTO, José do santos Naimori Bucar iha Salaun Maubai MACLN Domingu ne’e.
Líder Masimu Partidu KHUNTO haktuir, hotu-hotu tenki tuir orientasaun polítika nian tanba polítika ne’e hanesan instrumentu nasaun nian, maibe iha palku nu’udar sidadaun Timor-Leste respeita malu hodi dezenvolve rai doben ida ne’e
“Ita hotu hatene katak polítiku ne’e instrumentu nasaun nian buat ne’ebé iha palku ne buat keta ida ita nu’udar sidadaun Timor-Leste ita tenki respeita malu tenki hadomi malu ita hotu tenki rekoñese katak polítiku ne’e ba ema hotu-hotu la parte ba ema ida, orienta ba sira atu respeitu mós ba ema hotu nu’udar sidadaun ida tenki kria paz no dame atu nune’e dezenvolvimentu bele la’o ho di’ak iha rai ida ne’e”
Prezidente partidu Kmanek Haburas Unidade Nasional Timor Oan (KHUNTO), Armanda Berta dos Santos informa, estrutura foun ne’ebé simu ona posse ne’e hodi servisu hamutuk nune’e bele atinji mehi Partidu Khunto nian
“ohin imi simu posse la’ós to de’it iha ne’e maibé presiza ita nia servisu hamutuk atu nune’e bele atinji ita hotu nia mehi ne’ebé durante ne’e ita hotu hakarak,hahu husi inisiu to agora votus ne’ebé imi fo ba partidu Khunto sei La haluhan to ohin loron KHUNTO bele hetan asentu iha Parlamentu ho kadeira 5 konta mós ho votus ne’ebé mai husi ita boot sira” dehan Presidente Partidu Khunto
Alende ne’e husu ba militante sira tenki servisu makas no fó apoiu ba partidu Khunto atu bele hadia di’ak liu tan situasaun rai laran nian liu-liu Infraestrutura, Edukasaun no Saúde, no buat ne’ebé la di’ak bele hadia halo di’ak no buat ne’ebé di’ak hela halo di’ak liu tan
Entretantu iha Tomada de posse ba Estrutura foun hamutuk 720 hetan partisipasaun husi Konsileiro Masimu Partidu Khunto no Prezidente Partidu Khunto no mós Estrutura Nasionál Partidu Khunto nian.
Jornalista: Felix Fernandes
