Lian Karau Dikur (Dili)-Core Grup Transferénsia Timor-Leste (CGT-TL) servisu hamutuk ho parseru dezenvolvimentu sira iha Timor-Leste kria aktividade formasaun prinsipal loron rua nian kona-ba politika Salvaguarda labarik sira, formasaun ne’e hala’o iha salaun yayasan HAK Farol Dili
Koordenador Core Grup Transferénsia Timor-Leste (CGT-TL), Jimicarter Moniz dos Reis hatete atividade ne’e sei koalia kona-ba politika salvaguarda labarik sira iha Timor-Leste hodi haree kona-ba labarik ne’ebé idade menor faan sasan ida dalan ninin
“Ita hotu hatene politika salvaguarda labarik nian importante tebes ba Organizasaun sira liu-liu sosiadade sivil oinsa bele tau iha sira-nia organizasaun nune’e bele ba implementa atividade iha Munisípiu hotu hodi fahé formasaun ba komunidade sira oinsa bele tau importansia ba labarik sira-nia direitu tanba labarik mak importante tebes ba nasaun ida-ne’e sai hanesan jerasaun foun ba futuru.” Dehan Koordenador Core Grup Transferénsia Timor-Leste Jimicarter Moniz dos Reis
Koordenador Core Grup hatutan tanba ne’e presiza tau importansia ba labarik sira nune’e koalia kona-ba direitu labarik nian tanba iha konstituisaun Republika Demokratika Timor-Leste kolia ona, katak labarik sira presiza tau protesaun husi familia, estadu nomos inan-aman rasik
“Ha’u hanoin katak liuhusi treinamentu ka formasaun ida-ne’e atu informasaun sira kona-ba boa seguransa ba labarik sira ne’e importante tebes ba membru sosiadade sivil liu-liu Core Grup Transferénsia Timor-Leste membru rasik oinsa bele uza materia sira ne’ebé ohin sira hetan ba fahe fali iha Munisípiu sira bainhira labarik sira partisipa bele asegura iha baze.” Dehan Koordenador Core Grup Transferénsia Timor-Leste
Koordenador informa liuhusi formasaun ne’e bele hasa’e ona membru sira-nia koiñesimentu no kapasidade oinsa bele utiliza manual politika salvaguarda labarik sira tanba ne’e importante tebes ba sosiedade sivíl tantu governu uza sai hanesan padraun ida nune’e bele gia no lao tuir format ne’ebé estabelese ona.
“Ita haree iha konvensaun diretu labarik nian iha prinsípiu tolu hanesan, ida laiha deskriminasaun ba labarik sira, rua labarik sira tenke partisipa iha atividade hotu-hotu, tolu labarik sira presiza moris iha identidade ne’ebé loos tanba ne’e haree katak importante tebes ba estadu ida-ne’e.” Koordenador haktuir
Koordenador afirma iha formasaun ne’e iha materia importante sira hanesan saida mak definisaun labarik, politika salvaguarda labarik ninian, kona-ba risku halo mitigasaun ba labarik sira iha baze.
Esplika liután atividade loron ohin nian realiza husi Core Grup Transferénsia Timor-Leste hamutuk ho membru 16 nune’e partisipa husi Organizasaun lokal hanesan Raies Hadomi Timor Oan (RHTO) no Radiu Komunidade Difisiensia Timor-Leste (RKDTL). Alende ne’e formasaun refere sei hala’o loron rua loron dahuluk kona-ba salvaguarda labarik, loron daruak kona-ba politika salvaguarda labarik nian iha Timor-Leste.
Ekipa kobertura: Lian Karau Dikur
